ზმნის ზოგიერთი თავისებურება ტაოურში

ანოტაცია

"სტატიაში განხილულია ზმნის ზოგიერთი თავისებურება ტაოურ დიალექტში, კერძოდ: ა. ტაოურ კილოში სუბიექტური მეორე პირის ნიშნებია ხ’-, ჰ’-, ს’- პრეფიქსები: ჩახყრი, შეჰჭამ, მისტყეპავ. იგივე მაწარმოებლები იხმარება ობიექტური მესამე პირის ნიშნებად: ჩავხყრი, დაავჰჭრი, სჭამენ... ბ. ტაოურში მესამე პირის სიმრავლის გამოსახატავად ხშირია -ან, -ენ სუფიქსების გამოყენება: აქვან (შდრ. აქვა[ნ]), ჯერავენ... -თ სუფიქსის ნაცვლად -ეს იხმარება უწყვეტელში: ქონდეს, მიჰყავდეს... გ. მომავალი დროის გამოსახატავად გამოიყენება კავშირებითი მწკრივს ფორმები: დათესო, გააპტყელო... დ. ტაოურისათვის დამახასიათებელია ზმნისწინთა მონაცვლეობა: გა:და: გაჭკვიანდენ (გიჟები). შდრ. დაჭკვიანდენ); გა:ჩა: გაყარა (წყალში. შდრ. ჩაყარა)... ე. მონაცვლეობენ თემის ნიშნები: ი:ავ: აწონავ (შდრ. აწონი), ვყიდავ (შდრ. ვყიდი)... ობ:ავ: იბანავ (შდრ. ბანაობ)... ებ:ავ: დასტაცავს (შდრ. დასტაცებს)... ავ:ებ: ილოცებს (შდრ. ილოცავს)... უთემისნიშნო ზმნებს დაერთვის -ავ: სწერავთ (შდრ. სწერთ)... ვ. თავისებურებები შეინიშნება ზმნის გვარის ფორმათა წარმოებაში: ე პრეფიქსიანი ვნებითი ცვლის დ’ სუფიქსიანს: ეთხვება (შდრ. თხოვდება)... ზ. მნიშვნელოვანი თავისებურებები ვლინდება ზმნის მწკრივთა წარმოებაშიც... ყველა მახასიათებლის გათვალისწინებით ტაოურს ცალკე დიალექტად გამოვყოფთ.